Toledoko Itunaren murrizketen aurkako elkarretaratzea egingo da larunbatean

0
286

Arrasateko jubilatuen eta Pentsiodunen Elkarteak deituta, otsailaren 13an bilkura bat egingo da, ‘Toledoko Itunaren murrizketei ez’ lelopean. Elkarretaratzea 12:30ean hasiko da Herriko plazan. Bertaratzen diren guztiek maskara eraman beharko dute, segurtasun-distantzia mantenduz.

Astelehenero bezala, pentsiodunak beste behin ere bildu dira gaur eguerdiko 12:00etan Herriko plazan. Hau da irakurri den testua:

“Emakume pentsiodunok agintari neoliberalek aurrekontuetan betikotu egiten duten genero-arrakala pairatzen dugu.

Pentsioetan dagoen alde %34koa da, Gizarte Segurantzaren datuen arabera. Emakumeen pentsioen %20 soilik dira 1.000 eurotik gorakoak, batez beste. Emakumeen pentsioen ia erdia alarguntza-pentsioa da, 755 euro batez beste. Batez bestekoek diru-sarrera askoz txikiagoak izatea ezkutatzen dute, ia beti pentsiodun zaharrenak, pobrezia-arrisku handiagoa dutenak eta baliabide gutxiago dituztenak.

Langile klaseko emakume pentsiodunok nekatuta gaude esaten digutelako erretirodunen, alargunen eta pentsio ez-kontributiboen pentsio murriztu hauek 1.080 euroraino (kopuru hori Europako Gutun Sozialak gomendatzen du, eta justizia sozialekoa da) osatzeko dirurik ez dagoela. Horrelako pandemia batekin, 2021erako aurrekontu publikoek gizartearen eskaerei erantzun behar diete, hau da, zerbitzu publikoak nabarmen hobetu behar dituzte eta herritarrek eskura dituzten baliabideak bermatu. EAEko aurrekontuek, beren eskumenen esparruan, arazo horiei erantzun behar diete. Ezin da esan lau haizetara ez dela murrizketarik egongo, egunez egun sufritzen ari garenean.

EAEko 2021eko aurrekontu-proiektuaren datuen eta zifren irakurketa labur batek esaten digu ez duela balioko sortzen dugun aberastasunarekin bat datozen bizi-baldintzak bermatzeko. Era berean, fiskalitatean uko egiten zaio erreforma integral bati.

Beste urte batez, historiako aurrekonturik sozialena balitz bezala saltzen digute, gastu sozialaren eta osasun-gastuen zifrak manipulatuz, aurreko urteetako aurrekontuak baino txikiagoak direnean.

Murrizketak atzera bota daitezke, justizia sozialeko aurrekontuak egin daitezke, dirua dagoelako egin daiteke!

Lau euskal herritarretatik bat pobrezia-arriskuan edo horretan murgilduta dagoela, gastu militarretan, hutsik dagoen Supersur bat, erabilgarritasunik gabeko abiadura handiko tren bat, 400 milioiko tunel baxu bat egiteko bideratzen duten milaka milioi diru publiko. Iruzurra eta zerga-ihesa ahalbidetzen dira. EAEra iritsiko diren Europako 13.000 milioi funtsetatik, Confebasck eta CEOE patronalek kontrolatzen dute ia diru guztia.

Eskatzen dugu EAEn aurrekontu-partida bat ahalbidetzea Gutxieneko Pentsioa 1080 eurora arte osatzeko.

1.200 euroko Gutxieneko Soldata eskatzen dugu, pentsio duina lortzeko.

Emakumeok aurrera!! Kalera!!

ERANTZUN BAT UTZI

Zure iruzkina utzi, mesedez!
Sartu zure izena hemen