Emakume atzerritarrentzako IMME elkarteko kideek beren lanaren egunerokotasuna eta egiten dituzten lanak kontatu dituzte Mondraberrin
2019ko abenduaren 19an, IMME elkartearen egoitza berria inauguratu zen emakume etorkinentzat. Beste herrialde batzutatik iritsitako emakumeek euskara eta gaztelania menderatzeko eta, gainera, egunerokotasunean mugitzeko baliabide desberdinak lortzeko pentsatutako espazioa da. Djamila Errebuelta kalean kokatutako elkarteko presidenteak dioenez, elkarte honen jatorria 2012. urtekoa da, bera hasi baitzen jatorri arabiarreko emakumeei gaztelania irakasteko moduak bilatzen: “Orain, integrazio-ikastaroak eskaintzen ditugu, emakumeak lan-ingurunean mugitzen has zitezen pentsatuta, baina, hasiera batean, asmoa hizkuntza menderatzea zen. Gauza asko ikas daitezke etorkinen integrazioa hobetzeari begira baina, horretarako, lehenik eta behin funtsezkoa da euskara edo gaztelania ikastea”.
Gaur egun IMME elkarteak euskarazko klaseak eskaintzen ditu astelehenetan Zuriñe irakaslearekin eta gaztelerazko ikasketak asteazken eta ostiraletan Anabelekin, elkartearen barruan ezinbesteko den beste irakasleetako batekin. Hasiera batean elkartea jatorri arabiarreko emakumeei heziketa eskaintzeko sortu bazen ere, azken urteotan asko izan dira euskara eta gaztelania ikasteko elkarteraino hurbildu diren munduko beste leku batzuetako emakumeak. Horrela, IMMEn posible da ikustea nazio edo herrialde ezberdinetako emakumeak:
Maroko
Sahara
Mauritania
Nepal
Pakistan
Latinoamerika
Aljeriakoak…
Euskara eskolen arduradun Zuriñek kontatzen duenez, ikasle gehienek gaztelera ikastaroa aukeratzen jarraitzen duten arren, seme-alabak zaindu eta lagundu beharrak euskara ikastera ere eramaten ditu: “Egia da, oraingoz, emakumeek nahiago dutela lehendabizi gaztelania menperatu, baina horietako asko euskara ikasten ari dira jada, beren seme-alabei eskolako lanekin lagundu ahal izateko”.
Elkarteak euskarazko dozena erdi ikasle ditu, eta hogeitik gora gaztelerazko ikastaroetan. Djamilak kontatzen duenez, ikasleen asmo onagatik izan ez balitz, elkartea ez zen inoiz existituko: “Hasieran, honetan lanean hasi ginenean, gure ikastaroetara hiruzpalau lagun etorriko zirela uste genuen, baina laster ikusi genuen ikasteko eta formatzeko jakinmin handia zegoela. Hizkuntza bat menperatzea kultura batean integratzeko lehen urratsa da, eta azken urteotan frogatu da etorkinen aldetik asmo argia dagoela gure egunerokoaren parte izateko”. Izan ere, elkarteko presidenteak kontatzen duen bezala, IMMEko kideek lor dezaketen abantaila nagusietako bat da babestuta sentitzea eta talde baten parte izatea: “Emakume etorkin bat atzerriko herrialde batetik hizkuntza bat menderatu gabe iristen denean, askotan bakartuta sentitzen da, eta ez daki eguneroko arazo asko nola konpondu. Elkartean egoera horietan moldatzeko baliabideak ikas ditzakete eta, gainera, arazo horiek lehenago konpondu dituzten beste pertsona batzuk ezagut ditzakete. Joan den astean, emakume batek nazionalitatea lortzeko informazioa eskatu zigun. Gai burokratikoak oso konplikatuak izan daitezke hizkuntza menperatzen ez duen emakume batentzat, baina, prozesu horretatik igarotako jendea dagoenez hemen, behar zuen informazioa eman ahal izan genion, gehien behar zuen moduan”.
Ikastaroak erabat doakoak dira eta izen-ematea elkartera joanda edo zuzenean 654884616 zenbakira deituta egin daiteke. Azken urte hauetako balorazioa egiteko orduan, konstantzia eta lana izan direla arrakastaren gakoak argi du Djamilak: “Herri honetan, sakrifizio handiz, ezerezetik enpresak sortzea lortu duen jendea egon da. Guk elkarte hau proiektu gisa abiatu genuen”.
