EBAko taldeak 18:30ean jokatuko du Solareseko kantabriarren aurka eta Bigarren Mailako neskek Unamunoko bilbotarren aurka 16: 15ean.
Testua: Ointxe!. Argazkia: MB artxiboa.
Gure bi taldeak euren lehiaketetan igoera postu bat lortzeko borrokan ari dira, beraz, igande arratsaldean oso garrantzitsua izango da Iturripeko harmailak zalez betetzea Mondragon Unibertsitateko bi taldeak animatzeko. 16:15ean neskek hartuko dute Iturripen Bilboko Mazarredo Fisioterapia Unamuno taldea.
Gure neskak Logroñon denboraldiko 4. porrota jasotzetik datoz, eta oraingo honetan beste porrot bat baino ez duen talde bat izango dute aurrean. Beraz, oso partida garrantzitsua da bi taldeentzat, eta, zalantzarik gabe, gure taldearen garaipen batek apur bat gehiago hurbilduko lituzke denboraldia amaitzean mailaz igotzeko bi postuetako bat lortzeko lehian.
EBAko Mondragon Unibertsitateak kontuz ibili beharko du Restaurante los Arcos Solares taldearekin. Kantabriako taldea zortzigarren postuan dago gaur egun, 13 garaipen eta 14 porrotekin, baina oraindik ez dago jaitsieratik salbatuta; beraz, fase erregularra amaitzeko 3 jardunaldi falta direnean, aurkari oso arriskutsua izango da gure taldearentzat.
Kantabrian jokatutako partidan gure mutilek luzapenean eta in-extremisean lortu zuten garaipena Solaresen, eta oso maldan gora jarri zitzaien partida osoan zehar. Talde kantabriarrean Sherman pibot ingelesa nabarmentzen da, 2,13 metroko mutila, batez beste 20 puntu eta 10 errebote partidako egiten dituena. Baina Diego Garcia joko-antolatzailea eta Carlos Sepulveda hegalekoa ez doaz atzealdera. 3 horien artean, taldeko puntuen % 80 baino gehiago egiten dituzte.
Gure taldearen aldetik, argi daukate partida honetako garaipena ezinbestekoa dela igotzeko asmoei eusteko. Geratzen zaien bidea oso gogorra da, Solaresen ondoren fase erregularreko azken bi partidak etorriko direlako, eta gure helburu bera duten beste bi talderen aurka jokatuko direlako. Beraz, ezin da huts egin Solaresen aurka.
