Enpresa horrek eta Mondragon Unibertsitateak altzairu herdoilgaitzezko botiletarako diseinurik egokienak aukeratzeko erabili duten lankidetzaren ondorio da proiektua. 2020-2021 ikasturteko 5 diseinurik onenak aukeratu ondoren, IBILIk aukeratu ditu jada 2021-2022 ikasturteko irabazleak.
Testua: Mondragon Unibertsitatea.
Enpresen eta unibertsitatearen arteko lankidetzaren onuren adibide argia da Mondragon Unibertsitatearen eta etxeko tresneria egiten duen IBILI enpresaren ekimena. 2020-2021 ikasturtean, 2 entitateak elkarlanean aritu ziren altzairu herdoilgaitzezko botila berrietarako 5 diseinurik onenak aukeratzeko. Industria Diseinuko Graduko hirugarren mailako ikasleen 65 proposamenen artean aukeratu zituzten.
Bost irabazleek aukera izan zuten beren diseinuak benetako produktu bihurtuta ikusteko, eta, duela urtebete, IBILIren esportazioen helmuga diren 60 herrialdeetako bezeroei helarazten zaien katalogoan ipini zituzten —ikaslearen izena eta diseinuarena zehaztuta—, bai eta haren web-orrialdean ere. Urtebetean, 10.000 unitate baino gehiago saldu dira, eta ez soilik Espainian; Israelen, Marokon, Andorran, Portugalen, Frantzian, Maurizion, Sri Lanka eta Costa Rican ere saldu dira, besteak beste.
Aurtengo irabazleak
Ekimenak izandako arrakasta ikusita, 2021-2022 ikasturtean berriro ekin diote elkarlanari 2 erakundeek, botila baten diseinu orokorra egiteko. «IBILIrentzat oso interesgarriak dira halako lankidetzak, gure erabiltzaileentzat gaur egun erakargarria izan daitekeenari buruzko ikuspegi eguneratua, berria eta gaztea eskaintzen baitigute», azaldu dute enpresakoek.
Bestalde, Mondragon Unibertsitateak esan duenez, «estrategikoa da gure ikasleak industriara hurbiltzea eta zuzenean ezagutzea haren erronkak; horregatik, oso garrantzitsua da halako lankidetzak sustatzea».
IBILIk katalogo berrian eta web-orrialdean jarri ditu jada irabazleen 5 diseinu berriak. Oraingoan, neskak izan dira irabazle guztiak. Mondragon Unibertsitateko Industria Diseinuko hirugarren mailako ikasleek egindako 64 proposamenetatik, enpresako diseinu- eta marketin-taldeak aukeraketa bat egin zuen, eta zenbait proposamen hautatu. Gero, IBILIko langileek botoa emateko aukera izan zuten, gustukoen zituzten diseinuen alde, eta 5 finalistak hautatu zituzten. Diseinu irabazleak salgai daude dagoeneko enpresaren katalogoan eta web-orrialdean, eta bai unibertsitateak bai enpresak iazko kopuruetara iristea espero dute.
Hauek dira aurtengo irabazleak: Teresa Pagaegi (Markina), Impact botilarekin; Ainara Urra (Zizur, Iruña), Horizon diseinuarekin; Mireia Elexpe (Durango), Cocolina botilarekin; Eider Gabirondo (Olazti, Nafarroa), Vinikunka diseinuarekin, eta Maitane Urkiola (Bergara), Marea diseinuarekin.
Ibili
Ibili sukaldeko tresneria egiten duen Gipuzkoako marka bat da, nazioarteko merkatuetara iristen dena. Enpresak 3.000 erreferentzia baino gehiago dituen katalogo zabala du, non denetarik baitago: zartaginak, ontziak edo kafeterak, kanpinerako tresneria eta abar.
Mondragon Unibertsitateko Goi Eskola Politeknikoa
Mondragon Unibertsitateko Goi Eskola Politeknikoa unibertsitateko ingeniaritza-fakultatea da. Fakultateak 4 egoitza eta instalazio teknologikoki aurreratuak ditu Arrasaten, Hernanin, Ordizian eta Bilbon, industriaren eta gizartearen erronkei aurrea hartzea ahalbidetzen dutenak. Ikerketarekin eta ezagutzaren transferentziarekin, eta enpresek lehiarako duten posizionamendua hobetzeko asmoarekin uztartzen du gazteen eta profesionalen prestakuntza. 2020an, ingeniaritzan matrikulatutako ikasle berririk gehien izan dituen estatuko unibertsitate pribatua izan da.
