MUk 100.000 euro banatuko ditu beketan Enpresa Sortuz programarekin

0
332

Mondragon Unibertsitateko Goi Eskola Politeknikoa oinarri teknologikoko negozio-ideia berritzaile eta jasangarrien bila dabil Enpresa Sortuz lehiaketaren edizio berri honetan. Izen-ematea maiatzaren 30ean amaituko da.

Testua: Mondragon Unibertsitatea.

Oinarri teknologikoko ideia berritzaile guztiek lekua dute Mondragon Unibertsitateko Goi Eskola Politeknikoak sustatzen duen Enpresa Sortuz lehiaketan. Jende askok ezin du negozio-ideia bat gauzatu baliabiderik ez duelako. Hori dela eta, Enpresa Sortuz lehiaketaren edizio berriak 100.000 euroko diru-zuzkidura eskaintzen du, oinarri teknologiko eta jasangarriko proiektuak gauzatzeko. Fagor Taldearen, Orbearen eta Centro Stirling sozietatearen laguntzari esker lortu da zenbateko hori biltzea. Enpresa horiek talentu teknologikoa eta lurraldean enplegua eta aberastasuna sortzea sustatzen dute. Guztira, unibertsitateko lehiaketak 6 beka emango ditu 2023-2024 ikasturtean, ideia irabazleak lantzeko eta emaitza merkatura eraman ahal izateko. Izen-ematea maiatzaren 30ean bukatuko da, eta ekainaren 8an jakinaraziko da zer pertsona edo talde diren finalistak. Final handia ekainaren 16an egingo da, Garaia Parke Teknologikoan. Finalistek epaimahaiari aurkeztu beharko diote beren proiektua.

Bi kategoria: ENGIPRENEURSHIP eta TECHNOPRENEURSHIP

Enpresa Sortuz lehiaketak bi kategoria eta hainbat sari ditu. Lehen kategoria ENGIPRENEURSHIP da, eta oinarri teknologikoko negozio-ideia berritzaile eta jasangarriak bilatzen ditu, merkatura eramaten saiatzeko. Hiru profil hauetako pertsonek eman dezakete izena:

  1. Unibertsitatearekin loturarik ez duten profesionalak edo ikasleak.
  2. 2023-2024 ikasturtean Mondragon Unibertsitateko Goi Eskola Politeknikoan Gradu Amaierako zein Master Amaierako lana egingo duten pertsonak.
  3. Mondragon Unibertsitateko ingeniaritza eskolako ikertzaileak.

Guztira, sei beka emango dira kategoria horretan, sarituek proiektua urtebetez landu dezaten. Gainera, sariak 10.000 euroko zuzkidura du, gehienez ere, proiektua gauzatzeko beharrezkoak diren gastu eta inbertsioetarako.

Kategoria horretan, ideia banaka edo taldeka aurkez daiteke. Besteak beste, honako hauek zehaztu behar dira proiektuan: bezero potentziala, merkatuaren tamaina, balio-proposamena, diru-sarrerak nondik lortuko diren, negozio-eredua, lehiakideen analisia, talde ekintzailearen aurkezpena, proiektuan egindako urratsak eta oraindik egin beharrekoak. Negozio ideiaren berrikuntzaz, bideragarritasunaz eta jasangarritasunaz gain, beste elementu batzuk ere balioetsiko dira, hala nola genero-oreka.

Bigarren kategoria TECHNOPRENEURSHIP da, eta oinarri teknologikoko produktu edo zerbitzu berritzaile eta jasangarriak ditu xede. Kasu horretan, ez da beharrezkoa proiektuak gauzatzea; ideia saritzen da. Goi Eskola Politeknikoko ikasleei dago zuzenduta, eta proiektuak banaka zein taldeka aurkez daitezke. Kasu horretan ere bezero potentziala, merkatuaren tamaina, balio-proposamena, diru-sarrerak nondik lortuko diren eta abar zehaztu behar dira, eta txosten batean aurkeztu. Finalista guztiek epaimahai baten aurrean aurkeztu beharko dute beren proiektua, eta ondoen egiten duenak 500 euroko saria jasoko du.

Izen-ematea

Lehiaketan parte hartzeko, interesdunek maiatzaren 30a baino lehen eman beharko dute izena. Dokumentazioa egun horretan aurkeztu beharko da. Ekainaren 8an jakinaraziko da zer pertsona edo talde diren finalistak, eta ekainaren 16an epaimahaiaren aurrean aurkeztu beharko dute proiektua (2 minutuko pitching batean).

Azken ekitaldia Arrasateko Garaia Parke Teknologikoan izango da. Parte-hartzaileek bertaratu egin beharko dute.

Enpresa Sortuz lehiaketari buruz

Duela lau urte hasi zen Mondragon Unibertsitateko Goi Eskola Politeknikoaren Enpresa Sortuz ekimena, eta azken urteotan nabarmen handitu da enpresek eta erakundeek eman dioten babesa, batez ere Arrasaten laster irekiko den HIREKIN Ekintzailetza Teknologiko eta Jasangarrirako Zentroaren harira. Fagor Taldeko Gizabidea Fundazioa da proiektuaren babesle nagusia, Orbea S. Coop. eta Centro Stirling sozietateekin batera. Haiez gain, MONDRAGON korporazioak, Saiolanek, Galbaianek, Gipuzkoako Foru Aldundiak, Eusko Jaurlaritzak, LABORAL Kutxako Gaztenpresa Fundazioak eta GARAIA Parke Teknologikoak ere babesten dute lehiaketa.  Erakunde laguntzaile horiei guztiei esker, Enpresa Sortuz lehiaketak 100.000 euro baino gehiago banatuko ditu 2023ko ekainean, beken eta sari ekonomikoen bidez.

Izena emateko esteka: https://docs.google.com/forms/d/e/1FAIpQLSeaL54GBMQA3yBC9RoyFRdZF1llyTkD8P5aSZfgTqEzq_MREQ/viewform

Mondragon Goi Eskola Politeknikoko ekintzailetza-taldearen kontaktua: ekintzetza.mgep@mondragon.edu

ERANTZUN BAT UTZI

Zure iruzkina utzi, mesedez!
Sartu zure izena hemen