Lan istripua gertatu da Transportes Pesaren garajean

LABek azaldu duenez, abenduaren 24ko txanda egiten ari zela, langile batek istripua izan zuen, enpresak Arrasaten dituen garajeetan. Langilea bi autobusen artean harrapatuta geratu zen, eta Gasteizko ospitalera eraman zuten. Uneotan UCIn dago, arriskutik kanpo, baina pelbisa eta hainbat saihets hautsita ditu.

0
78

Testua: LAB. Argazkia: MB artxiboa. 2019ko abenduak 27, ostirala

Abenduaren 24ean, beste lan-istripu bat gertatu da. Oraingoan, Grupo Avanza barruan dagoen Transportes Pesa S.A. enpresan izan da. Abenduaren 24ko txanda egiten ari zela, langileak istripua izan zuen, enpresak Arrasaten dituen kotxeretan. Langilea bi autobusen artean harrapatuta geratu zen, eta Gasteizko ospitalera eraman zuten. Uneotan UCIn dago, arriskutik kanpo, baina pelbisa eta hainbat saihets hautsita ditu. Ospitaleko mediku taldea Donostiako ospitalera eramatea baloratzen ari da.

LAB sindikatutik denbora asko daramagu enpresak Arrasaten dituen instalazioen baldintza eskasak salatzen. Arrasateko kotxetegiak oso txiki geratu dira. Gero eta autobus gehiago daude, eta gero eta handiagoak dira; beraz, espazio arazoa arrisku larria izaten hasia da langileen osotasunerako. Oraingoan ez da hilgarria izan, baina bai oso larria. Lankide bat dugu UCIn, eta horren arrazoia da ez dagoela maniobratzeko lekurik, eta beti egon behar dugu gutako bat lankideari laguntzeko, autobusa atera eta sartu ahal izan dezan. Horrek, zoritxarrez oraingoan egiaztatu dugun bezala, etengabe harrapatzeko arriskuan jartzen gaitu, eta gero eta hurbilago ikusten dugu norbaitek zorigaiztoko istripu bat duen eguna.

Enpresari premiazko bilera eskatu diogu gertatutakoa argitzeko eta premiazko neurriak exijitzeko. Gero eta baldintza okerragoetan gaude. Duela aste batzuk, garajearen ondoko mendiaren magalaren zati bat erori egin zen, euriteen ondorioz. Erorketa horrek instalazioaren zati bati eragin zion. Autobus batzuk hilobiratuta geratu ziren, baita aldagelaren zati bat eta garajearen zati bat ere. Enpresak ez du arazo hori oraindik konpondu, nahiz eta sindikatu honek eskaerak egin. Espero dezagun oraingoan enpresak bere erantzukizunak bere gain hartzea kasu honetan, eta behingoz irtenbidea jartzea Arrasaten bizi dugun egoera prekario eta arriskutsu honi. Oraindik ez dugu enpresaren erantzunik.

LAB sindikatutik gure babes osoa eta besarkadarik beroena bidali nahi diogu istripua izan duen lankideari. Azkena izan dadila!

ERANTZUN BAT UTZI

Zure iruzkina utzi, mesedez!
Sartu zure izena hemen