Argazkia: Mondraberri
EAJ-PNV-ek gaur, maiatzak 7, prentsaurrekoa egin du, Udal Gobernuak utzi dituen 13 milioi eurokoko soberakina dela medio. Bertan izan dira Agurne Juldain zinegotzia eta Ander Garay bozeramailea. Gobenuaren geldialdia kritikatu dute eta 6 proposamen jarri dituzte mahai gainean, “diru horri erabilpen bat emateko”.
Ander Garay bozeramaileak esan duenez, “Urtebete atzera botatzen badugu, esperotako sarrerrak 2 milioi altuagoak izan ziren eta 10 milioi euroko soberakin bat egon zen. Orain sarrerak 200.000 € baxuagoak izanda ere soberakina askoz altuagoa da”. Testuinguru honetan, Jeltzaleek argi dute soberakinen arrazoia: “Inoizko soberakin altuena daukagu, bereziki, paralizatuta dagoelako udala.” Bestetik, uste dute urriko osoko bilkuran onartutako %4 eta %5eko zerga igoera ez zela beharrezkoa, “soberakin bat egongo zela aurreikusten zelako” eta ” 0€-ko zor batekin, Udalaren egoera finantziarioa ona delako”.
EAJ-PNVren proposamenak
Analisi kritikoa egin ostean Ander Garayk 6 proposamen jarri ditu mahai gainean, “Arrasate biziberritzeko” eta “gauden paralisitik irten eta Udala berriz martxan jartzeko”. Lehen 4 proposamenak paralizatuta geratu ziren planak dira:
- Udalerriko asfaltatze-plana: 300.000 € udalerriko hainbat eremutan asfaltatze lanak egiteko. “Errepideetan geroz eta zulo gehiago daude”.
- Aprendices haur parkerako estalkia: 100.000 €-ko proposamena parke hori estaltzeko. “Duela 10 urte ez zegoen parke estalirik Arrasaten, orain badaude, baina denak auzoetan, edigunean falta da”.
- Santa Barbarako haur-parkea hobetzeko 100.000€. “Inguru aproposa da elementu naturalez sortutako parke bat eraikitzeko”.
- Iturripeko kiroldegia eraikitzea: 3.600.000 €-ko esleipena proposatzen dute, diseinurako 600.000 € eta obrak lehenbailehen hasteko 3.000.000 €. “Finantzaketa konpartitua izan behar den proiektua dela ulertzen dugu, baina Udalak obrak hasi ahal izateko dirua ordaindu behar du”.
Beste bi proposamenak berriak dira:
- Gorostizan igogailuak eraikitzea: 2.400.000 € mugikortasun-plana amaitzeko, soberakinetik erabat datozen funtsekin.
- Santa Teresa-Donezteberako dirulaguntzak: 2.000.000 €-ko proposamena energia-eraginkortasuneko eta irisgarritasuneko laguntzetarako, Eusko Jaurlaritzatik aldez aurretik jasotako finantzaketa osatuz. Eusko Jaurlaritzak laguntza eman zion Udalari aurreko legealdian. Laguntzaren zati bat Santa Teresako eta Doneztebeko 90 etxebizitzatan energia-eraginkortasuneko eta irisgarritasuneko neurriak ezartzeko bizilagunentzako laguntza-lerro bat zen. 90 etxebizitza baino gehiagok erakutsi zuten interesa, eta asko izan dira dirulaguntzarik gabe geratu diren bizilagunak. EAJ ren ustez, “aukera bikaina da soberakinetik 2.000.000 € bideratzea interesa izan baina laguntzarik gabe geratu diren bizilagunei laguntza horiek eman ahal izateko”.
Bestetik, gainerako soberakinak gordetzea eskatu du EAJ-k “beharrezkoa ez den zorpetzea sahiesteko” eta 2024ko aurrekontuan EHBilduk eta Elkarrekin Podemosek duten 4.000.000€-ko mailegua eskaera ez gauzatzeko, superabita sahiesteko. Azkenik, Ander Garayk adierazi duenez, “proposamenak aurreko astean bideratu genizkion gobernuari, negoziatzeko eta akordio batera iristeko eskua luzatuz”.
