Jaurlaritzak udalei eskatu die aurreikusitako ekitaldi ez-seguruak “bertan behera uzteko edo atzeratzeko”

Argazkia: EITB.

EAEn denera 40 udalerrik dute 150eko intzidentzia tasa baino altuagoa. Ondorengo neurriak aplikatzekoak dira 150 kasu baino gehiagoko udalerrietan.

Arrasatek atzo 235eko tasa zuen, hau da, Arrasaten ere ondorengo neurriak indarrean sartuko dira:

Ekitaldia bertan behera uztea edo atzeratzea, baldin eta ekitaldian egungo neurriak beteko ez direla aurreikusten bada. Neurri horiek urriaren 6an jarri ziren indarrean, eta batez ere maskararen erabilera, neurri batean, saihesten dituzten ekitaldiei dagozkie. Hau da, jan eta edan ohi da.

Eusko Jaurlaritzak udalei aholkatzen die antolatzen dituzten ekitaldi publikoetan babes-neurriak indar ditzatela.

Osasun Sailak dei egiten du pertsonen arteko distantziak handitzera, pertsonen joan-etorri ordenaturako zonak jartzera, janarien eta edarien kontsumorako guneak mugatzera, eta ekitaldiak toki irekietan egitera, ahal dela.

Osasun Sailak txosten epidemiologikoa astero bitan helaraziko du, astelehenetan eta asteazkenetan, kontzientziarako eta birusari aurre egitea errazteko. Neurri berri hauek bihar (azaroak 17) sartuko dira indarrean.

Neurri berri hauez gain, orain arteko neurriek indarrean jarraituko dute, hau da: Espazio itxietan eta 5.000 lagunetik gorako edukiera duten esparruetan antolatutako ekitaldietan % 80eko muga eta leku itxietan edota kanpoaldean egiten diren kirol eta kultur ekitaldietan jatearen eta edatearen debekua (ura bakarrik edan daiteke). Jateko eta edateko propio egokitutako lekuetan soilik kontsumitu ahal izango da.

Oro har, musukoen erabilera derrigorrezkoa da toki itxietan, eta segurtasun tartea ezin bada errespetatu leku irekietan.

Covid ziurtagiriari dagokionez, Euskoa Jaurlaritzak EAEko Auzitegi Nagusiari eskatuko dio ziurtagiria eskatu ahal izatea tabernetan, jatetxeetan, kontzertuetan eta gaueko aisialdian.