Eguerdian manifestu bat irakurri dute Herriko plazan eta Puro Relajo taldearen kontzertuaz gozatu dute.
Ekitaldiz betetako aste baten ondoren, Pertsona Nagusien Astearen egitaraua itxiko da gaur, Adinekoen Nazioarteko Egunaren ospakizunarekin. Nagusien Kontseiluak, Ozenki, Arrasateko Udala, Ibai-Arterekin elkarlanean, agur festa handi bat antolatu du. Eguerdian, manifestua irakurri dute Herriko plazan Pili Iriarte Nagusien Kontseiluaren lehendakariak eta Margari Gorrotxategi Sasoibideko kideak. Oso modu positiboan baloratu dute ekimenak izan duen arrakasta, eta arrasatearren babesa eskertu dute.
Manifestuan gogoratu dute “gizarte gisa, eta, batez ere, Kontseiluaren erronka gisa, ikuspegi berri bat izan behar dugu ‘nagusi egitea’ zer den ulertzeko, eta gizabanako gisa, eredu mentala aldatu behar dugu, ikuspegi positibo, proaktibo eta prebentibo baterantz.” Azpimarratu dute ere “Erronka asko ditugu aurretik, hala nola, bakardadeari eta isolamenduari aurre egitea, osasuna hobetzea, zainketan laguntzea eta adinekoei egokitutako teknologiak erabiltzea. Gainera, hemen gauden pertsona askok etxean zahartu nahi dugu, Arrasaten, gure ingurunean. Horregatik, batzuetan, gure etxebizitza egokitzea, teknologiaren laguntza izatea edo baliozko sare komunitarioak izatea eskatzen du.” (Manisfestu osoa bukaeran)
Ondoren, Puro Relajo taldea igo da eszenatokira. Arrasaten oso talde ezaguna da, behin baino gehiagotan jo baitu herrian. Nafarroako taldeak, ohi bezala, abesti mexikarrez eta latinoamerikarrez osatutako errepertorioa interpretatu du. Urdaiazpiko iberikoaren pintxoez gozatu ahal izan dute ere Herriko plazara hurbildu direnek, urdaiazpiko-ebakitzaile baten eskutik. Bestalde, Ibai-Artek km0-ko produktuz osatutako 50 otzara zozketatu ditu, Merkataritza Berdearen baitan, eta gaur banatu ditu Herriko plazan ere.
Trio de Medianoche eta The Song
Ez da gaur egingo den kontzertu bakarra izango. Arratsaldeko 19:00etan Trio de Medianoche taldeak kontzertua eskainiko du Portalonen. Eibarko taldeak boleroak interpretatzen ditu nagusiki, eta ‘La Voz’ saioan parte hartu zuen. Azkenik, The Song blues eta rock taldeak kontzertua eskainiko du Arbolapetan arratsaldeko 20:30ean. Arrasate Bluesen bi edizioetan parte hartu duen taldea da.
Manifestua:
“Gaur urriaren 1a ospatzen dugu, ekitaldi alaiekin, musikalekin, jaiekin, Arrasateko Pertsona Nagusien Kontseilutik ez da ezer hoberik bizitza ospatu ahal izatea baino. Bizitza gero eta luzeagoa, horrek dakarren guztiarekin.
Bizitza-luzera berriaren ezaugarria da, hain zuzen ere, gizakiok ez garela inoiz hainbeste urtez bizi izan. Kalkuluen arabera, bizi-itxaropena 100 urtekoa izango da laster, eta 120 urte inguruko atalase naturalera iritsiko da denbora gutxian. Aurrekaririk gabeko egoera honetan oinarritu ahal izateko, paradigma berri batean mugitu behar dugu. Paradigma horrek, zoritxarrez, narratiba zahar batek baldintzatuta jarraitzen du, mito eta gertakari anakronikoek alboratuta. Gizarte gisa, eta, batez ere, Kontseiluaren erronka gisa, ikuspegi berri bat izan behar dugu “nagusi egitea” zer den ulertzeko, eta gizabanako gisa, eredu mentala aldatu behar dugu, ikuspegi positibo, proaktibo eta prebentibo baterantz.
Erronka asko ditugu aurretik, hala nola, bakardadeari eta isolamenduari aurre egitea, osasuna hobetzea, zainketan laguntzea eta adinekoei egokitutako teknologiak erabiltzea. Gainera, hemen gauden pertsona askok etxean zahartu nahi dugu, Arrasaten, gure ingurunean. Horregatik, batzuetan, gure etxebizitza egokitzea, teknologiaren laguntza izatea edo baliozko sare komunitarioak izatea eskatzen du. Kontseiluan gizarte-sare sendoa sustatu nahi dugu, familian, lagunartean edo komunitatean. Hau da, gu guztiok ahalduntzea, gure autonomiaren alde borrokatzea eta lan egitea, ingurunearekin loturak ehuntzea eta gure eskubide, betebehar eta askatasunak sustatzea.
Gaur nabarmendu nahi dugu argi dugula pertsona guztiok dugula, gure adina edozein dela ere, oinarrizko zerbitzuak autonomiaz jasotzeko eskubidea. Teknologiak ez lituzke oztopo berriak sortu behar, edo lehendik dauden desberdintasun sozialak areagotu; horiek ezabatzen lagundu beharko luke. Digitalizazioaren diskriminazioak ez dio bankuari bakarrik eragiten, oinarrizko beste zerbitzu batzuei ere eragiten die, hala nola, medikuaren hitzordua eskatzean edo gizarte-segurantzan prestazio bat eskatzean. Kudeaketa horiek guztiak Internet bidez egiteko aukera aurrerapauso handia da, zalantzarik gabe, eta alderdi positibo asko ditu, baina ezin da bide bakarra izan, eta ezin dira lehendik zeuden zerbitzuak ordezteko izan, horrek eragotzi egiten baitu pertsona askok beren oinarrizko eskubideez gozatzea, eta, gainera, eskainitako zerbitzuak okertzea eragiten du.
Teknologiak zerbitzuak hobetu eta gure bizitzak erraztu behar ditu, ez du bazterkeria-modu berririk sortu behar, eta autonomiaz bizitzeko eta erabakiak hartzeko gai diren pertsonak ez lituzke ezgaitu behar. Horregatik, digitalizazio-prozesuak inklusiboa, unibertsala eta doakoa izan behar du pertsona ahulenentzat.
2017an hasi ginenetik gauza asko aldatu dira, eta Arrasaten ikusaraztea lortu ditugu. Zahartzaroa jada ez da gaixotasunaren sinonimoa. Gure bizitzaren zatirik handiena osasun onaz gozatuz bizitzea aurreikusten da. Gaur egungo adineko jendea askoz aktiboagoa da eta gizartean inplikatuta jarraitu nahi du. Pertsona nagusiak oso talde heterogeneoa dira eta ezin dira talde uniforme gisa etiketatu. Hezkuntza eta belaunaldien arteko interakzio-maila handiagoari esker, pertsona nagusiak gero eta hurbilago daude eta teknologia gero eta gehiago erabiltzen dute.
Gaur, hemen, gainera, gogoeta egiten dugu: emakumeok gizonek baino bizi-itxaropen handiagoa dugu, baina, aldi berean, gaixotasun gehiago garatzen ditugu, bereziki kronikoak. Urte gehiago bizi garenez, gure bizitzako azken urteak bakardadean bizitzeko aukera handiagoa dugu, asko alargundu egiten garelako. Hori gutxi balitz, ekonomiari dagokionez, emakume nagusiok, batez beste, gizonek baino %32 gutxiago kobratzen dugu pentsioan. Hala ere, emakumeak gara erabaki ekonomikoak hartzen ditugunak, eta erretiroaren ikuspegia errealistagoa da gizonena baino. Azkenik, azpimarratu behar da emakumeak garela zaintzaile nagusiak.
Gaur egun, etorkizunari helburu berriekin begiratzen diogu eta baita mantentzen diren beste batzuekin ere. Gure lehentasuna da gaur egun 65 urte edo gehiago duten arrasatearren %25 baino gehiago ordezkatzen duen pertsona nagusien ordezkaritza izatea Udalean. Eta herritarrekin eta alde guztien borondatearekin batera, helburu hori eta beste batzuk betetzea eta gauzatzea lortuko dugu. Orain, goza dezagun gaurko egunaz, asteaz gozatu dugun bezala, eta ospa dezagun eta goza dezagun bizitza-luzera berriaz.”
