Gure herrian bi fabrikatan, behintzat, egin ziren denetariko itsulapiko metalikoak, Cerrajeran eta Joman. Garai batean, etxe denetan egongo zen halakoren bat, umeek dirua aurreratu zezaten, eta helduek, dirua eta beste zerbaitzuk giltzapean gordetzeko. Modeloak gorabehera, gehienetan marka sarrailak zeukan eta hala jakin zitekeen zein fabrikatan egina zegoen.
