Martxoaren 8an, Covid-19ak sortutako pandemiaren ondorioz, kirol-lehiaketa guztiak bertan behera geratu ziren. Arrasateko taldeei ere eragin zien Espainiako Gobernuak ezarritako larritasun egoerak. Kaltetuetako bat Ointxe! izan da. Mondragon Unibertsitateko entrenatzaileak klubaren egoeraren berri eman digu.
Zein egoeran dago orain Mondragon Unibertsitatea?
Egoera honek ezustean harrapatu gintuen. Pixkanaka jokalariak galtzen joan gara. Zach-ek lehen bi asteak Arrasaten eman zituen, baina egoera okerrera zihoanez, eta mugak itxiko zituztela ikusi genuenean, jokalariarekin batera erabaki genuen onena etxera itzultzea zela.
Bestalde, Beñat Barberena Arrasatera 3 asterako etorri zen, oraindik hemen jarraitzen du, ezin izan da Txinara itzuli, eta ez daki itzuliko den edo ez. Gainerakoekin entrenatzen jarraitzen dugu, telematikoki, astean 3 saio prestatzaile fisikoarekin eta entrenatzaileekin.
Egia esan, federazioak geldialdia iragarri zuenetik gutxi aurreratu da egoera. Bi komunikatu egin ditu itzulera atzeratzen, eta azken hilabeteetan ez dugu berririk izan. Inkesta pare bat bidali dituzte irtenbide pare bat proposatzeko, eta klub bakoitzari hobekien egokitzen dena zehazteko. Baina oraindik ez dute ezer esan EBA ligari buruz.
Zuen kasuan, zein litzateke irtenbiderik onena, klubari gehien interesatzen zaiona?
Taldeak beti jokatu nahi izan du, ahal den neurrian, eta osasun neurriek uzten duten guztietan, liga jokatzen amaitu nahi dugu. Baina egoera ikusita, oso zaila izango da. Ziurgabetasun handia dago.
Ekonomikoki ere kalte handia egiten ari zaie klub guztiei. Baina azkenean federazioari dagokio ligarekin zer gertatzen den erabakitzea, igoerak, jaitsierak,…
Gure kasuan, amaitzeko 6 jardunaldi falta zirenean ligaren lehen postuan gindoazenez, ez dakigu maila hori errespetatuko diguten igoera posible bati begira; izan ere, EBA ligaren formatua konferentziaka jokatzen denez, ez da txapeldun bat izaten, igoera beste konferentzietan lehen geratu direnen aurka jokatu behar da, eta egoera honetan jokatzea ere ez litzateke posible izango. Oraingoz ez digute ezer esan.
Egoera igoera fase hori jokatzea bada ere, egia esan, talde gehienek jokalari atzerritarrak galdu dituzte, eta etxera itzuli dira. Federazioei sortzaileak izatea dagokie, eta lehiaketarako, taldeetarako eta saskibaloirako erabakirik onena hartzea.
Ointxeren kasuan oso harrobi garrantzitsua duzue, zein da harrobiaren egoera?
Ointxek oso ondo jarraitu du lanean konfinamenduan zehar. Euskal ligako eta errendimenduko talde guztiek, baita partaidetza-talderen batek ere, telematikoki entrenatzen jarraitu dute. Astean 2 edo 3 aldiz ari dira saioak egiten, talde bakoitzaren eta entrenatzaileen posibilitateen arabera. Zuzeneko harremana dago jokalari guztiekin.
Klubean lan oso ona egiten ari gara ahal dugun neurrian. Egia esan, ez da gauza bera etxean edo kantxa batean entrenatzea, baina prestatzaile fisiko bat dugu, bakoitzaren beharrei erantzuten diena. Jokalari bakoitzaren egoerara eta etxean dituzten posibilitateetara egokitzen saiatzen gara.
Euskadiko eta Gipuzkoako federazioak erabakiren bat hartu du kudeatzen dituzten ligei dagokienez?
Gipuzkoako federazioak ez digu ezer esan ofizialki, baina estraofizialki aurreratu dute eskola-kirol guztia bertan behera geratu dela. Junior mailako emakumezkoen partaidetza taldearen kasuan, klubaren helburu nagusietako bat errendimendura igotzea zen, eta orain airean gelditu da. Denboraldi osoan ez dute partida bat galdu, eta liga bertan behera uzten badute, gerta liteke taldeak datorren denboraldian errendimenduan ezin parte hartzea. Federazioak ezer esaten ez duen bitartean, ez dakigu zer gertatuko den.
Jokalariek eta entrenatzaileek egindako lan ona dela eta, hainbat talde ditugu lehen postuetan liga irabazteko eta igotzeko aukerekin, eta orain ez dakigu zer gertatuko den.
Euskal federazioaren kasuan, amaitzeko bi proposamen aukeratzeko inkesta bat bidali du, eta ohar bat atera berri du denboraldia amaitutzat emateko. Datorren denboraldirako hasiko gara lanean. Gainera, Ointxek etxeko lanak egin dituenez, eta taldeak maila guztietan posizio onetan genituenez, Euskal Ligan jarraituko dugu.
Egoera normalizatzen bada, noiz itzuliko duzue lehiaketara datorren denboraldian?
Ofizialki ez dakigu ezer, baina klub guztiok nahiko genuke normalean egin ohi ditugun egunetan itzulitzea, iraileko azken astean edo urriaren lehenengoan. Orain, gobernuak deseskalada iragarri duenez, talde federatuak denboraldia planifikatzen ari gara, maiatzaren azken astean entrenamenduetara itzuli ahal izateko.
EBA ligako taldea, gobernuak ezarri dituen parametroak kontuan hartuta, itzuliko al da entrenamenduetara?
EBA ligako taldeak ez dira profesionaltzat hartzen. Atzo galdetu nion federazioari ea EBA ligaren kasuan profesionaltasun-traturik zegoen maiatzaren 4an itzultzeko, baina ezetz erantzun zidaten. Talde federatua denez, maiatzaren amaieran entrenamendu kolektiboetara bueltatuko gara.
Bestalde, entrenamenduetara itzultzeko, arazoa da udalek kiroldegiak ireki behar dituztela. Entrenatzeko, ezinbestekoa zaigu beharrezko kantxak edukitzea. Ez dago gure esku soilik, kirol-esparruak berriro irekitzearen mende ere badago.
Oraingoz, pazientzia izatea eta ditugun baliabideekin (ordenagailuaren eta mugikorraren kamera) lanean jarraitzea, eta borrokan jarraitzea besterik ez zaigu geratzen.
