“Eskolara Oinez” Europako Mugikortasun Iraunkorraren Astean

0
450

Eskolako bideak motordun ibilgailuak alde batera uztea du helburu.

Testua eta artxiboko argazkia: Udalako Ingurumen Eskola.

Zazpigarren urtez jarraian, Eskolara Oinez egitasmoaren baitan, motordun ibilgailuak alde batera utzi eta oinez mugitzera animatu nahi ditugu Arrasateko ikasle eta irakasle guztiak.

Irailaren 16tik 22ra gauzatzen da Europako Mugikortasun Iraunkorraren Astea, aurten, “zure osasunagatik mugi zaitez modu iraunkorrean” lelopean.

Trafikoaren zarata eta kea gutxitzeko, eskola inguru seguruagoa izateko, berotegi efektuko gasen emisioa murrizteko edota norberaren osasuna hobetzeko, garrantzitsua da mugikortasun aktiboa izatea.

Mugikortasun iraunkor, osasuntsu eta seguruaren alde egiteko, eskolara oinez joatera animatzen ditugu Arrasateko ikasle guztiak irailaren 16tik 22ra. Aurten ere, Udalako Ingurumen Eskolako irakasleek gidatuko dituzte bi ibilbide, eta Arrasate Herri Eskolako 3, 4, 5 eta 6. mailetako ikasleek hartuko dute parte. Bi ibilbide egingo dira; bata Biterin hasiko da eta, bestea, San Andres auzoko Kurtze-txiki plazan.

Aurten, zabaldu egin dugu eskaintza, eta 3. mailatik 6. maila arteko ikasleek hartu dezakete parte. Egitasmoan parte hartzeko izena eman beharra dago irailaren 14a baino lehen.

Aste hau igaro ondoren, animatu nahi zaituztegu, lagunen artean elkartu, taldeak osatu, eta oinez joaten jarraitzera ikasturte osoan zehar. Animatu zaitezte! Ingurumenaren eta osasunaren alde egin, eta eskolara oinez joan!

Ikasturte honetan, gainera, Eskolako Agenda 2030 proiektuan Garapen Iraunkorreko Helburuetan (GIH) hamaikagarrena landuko dugu: Hiri eta komunitate jasangarriak.

Hiriak eta kokaguneak inklusiboak, seguruak, erresilienteak eta jasangarriak izatea lortzea izango da proiektuaren xede nagusia eta eskolara oinez egitasmoak guztiz bat egiten du helburu horrekin.

ERANTZUN BAT UTZI

Zure iruzkina utzi, mesedez!
Sartu zure izena hemen