Irailaren 15era arte eman ahal izango da izena, eta entrenamenduak urriaren 7an hasiko dira.
Oporren bueltan, Dorletako Ama Txirrindulari Taldea denboraldi berria prestatzen hasi da, eta izen-emate kanpaina martxan jarri du. Taldearen helburua bailarako neska-mutilek bizikletaz gozatzea eta kirola lagun giroan egitea da.
Aurtengo denboraldian hiru kategoria izango dira: benjaminak (2017 eta 2018 urteetan jaiotakoak), alebinak (2015 eta 2016) eta infantilak (2013 eta 2014). Entrenamenduak asteazken eta ostiraletan egingo dituzte, 18:00etatik 19:00etara.
Izen-emateko edo zalantzak argitzeko, interesdunek dorletatxe@hotmail.com helbidera idatzi beharko dute. Bertan emango zaie izen-ematea gauzatzeko beharrezko informazio guztia.
Izen-emate epea irailaren 15era arte egongo da zabalik, eta entrenamenduak urriaren 7an hasiko dira. Taldeak bailarako neska-mutikoak animatu ditu bizikleta hartu eta taldean txirrindularitzaz gozatzera.
Bestalde, Dorletako Ama Txirrindulari Taldeak eskerrak eman dizkie denboraldi honetan taldea babesten duten enpresa eta udalei. Honako hauek dira babesleak: JMA, Oreka Cycling Space, Laboral Kutxa, Dikar, Ion Zerbitzuak, Mondragon Assembly, Ikerlan, Fagor Professional, Fagor Arrasate, Fagor Ederlan, Arizmendi Ikastola, Arrasateko Udala eta Aretxabaletako Udala.
