Besaide mendi elkarteak gaur arratsaldean egin du urteko batzarra Kulturaten, 19:00etan hasita. Bilkuran herritar ugari bildu da, adin eta genero anitzeko partaidetzarekin, elkartearen jarduerarekiko interesa agerian utziz.
Batzarra Olatz elkarteko lehendakariak gidatu du, eta bertan jakinarazi du hau izango dela bere azken urtea lehendakari karguan. Horren harira, 2026.urtean zehar 2027-2030 agintaldirako lehendakaria eta zuzendaritza taldea nor izango diren pentsatzen eta lantzen hasiko direla azaldu du.
Bestalde, 2026rako plana eta aurrekontu berria aurkeztu dituzte, baita 2025.urtearen balorazioa egin ere. Azaldu dutenez, 2025eko jardueren balantzea positiboa izan da, eta aurten ere orain arteko egiturari eutsiko zaio, mendiko irteerak mantenduz.
Horrez gain, elkarteak ekintza berrien inguruko informazioa eguneratutako egutegi edo webgune baten bidez zabalduko du. Aurtengo berrikuntza nagusien artean, AIBA mendi-martxa berriro antolatuko dutela nabarmendu dute, bi urtetik behin egiten den ekintza izanik.
Batzarrak Besaide elkartearen etorkizuneko ildo nagusiak zehazteko balio izan du, jarraikortasuna eta berrikuntza uztartuz.




