Udalak udazken honetako kultur egitarau nagusietako bat aurkeztu du: “Oreixe Akustikoa 2026” musika zikloa, Juan Arzamendi Musika Etxeko Auditoriumean egingo dena. Aurten, egitasmoak egitura aldaketa nabarmena dakar, aurreko edizioetan kontzertuak bi asteburutan pilatzen baitziren; aldiz, edizio honetan emanaldiak hiru hilabetetan zehar zabalduko dira, irailetik azarora bitartean modu pausatuagoan eta jarraituagoan, guztiak ere ostiraletan arratsaldeko 19:30ean.
Guztira kalitatezko zazpi proposamen akustiko igoko dira oholtzara. Egitaraua irailaren 11n abiatuko da Hondora taldearen rock, pop, funk, soul eta R&B doinuekin, eta irailaren 25ean jarraituko du Aitor Castels egile menorquinarraren ingelesezko trilogiarekin. Urrian bi saio izango dira: hilaren 9an Ramona’s First Evil Boyfriend bikotearen folk, shoegaze eta pop-rock ikuskizuna, eta hilaren 23an Sophi kantautore gasteiztarrak gidatutako Flor y Trol proiektua. Azaroan, azkenik, hiru emanaldi eskainiko dira: azaroaren 6an Garazi Esnaola piano-jotzailearen bakarkako lana, azaroaren 13an Rob Leinesen rock eta country indartsua power trio formatuan, eta azaroaren 20an Habia soka eta ahots laukotearen disko berria.
Emanaldi bakoitzerako sarrerak dagoeneko salgai daude 5 euroren truke amaiaarrasate.janto.es webgunean, baita egunean bertan leihatilan ere. Gainera, Udalak 5 sarrera bikoitz zozketatuko ditu kontzertu bakoitzeko Arrasateko APP mugikorraren bidez, emanaldi bakoitza baino bi egun lehenagora arte izena emateko aukera irekita mantenduz.
